بنت أختك

رنة غريبة من نمرة غريبة على موبايلي، هي النمرة غريبة.. مش اللي رشا أديتهالي...لكن الساعة تلاته..معاد رجوع زينة... زي رشا أختك ما قالت لي...

أخدت المفتاح ونزلت ووقفت عند البوابة...الجو حلو..

البواب ماسك الخرطوم وبيرش الجنينة اللي تحت العمارة..الأتوبيس لم يأت..

مضطرة أتابع رمضان البواب وأركز معاه..لسه بيرش...بس الحنفية اللي متوصل فيها الخرطوم بايظة..قصدي يعني الوصلة بايظة..مش عارفة المهم أن الخرطوم بيطلع رزاز على نطاق 360درجة داير مايدور..

أسترخي يا حنان ...ده مجرد رذاذ..المفروض يعني انه يعمل نعنشة..الرذاذ وصل لعندي، ضايقني، مستمر في الدوران والوصول لوجهي المكفهر بسبب الشمس اللي ضربت في وشي بعد ما طلعت من ورا السحابة..

أنادي على البواب أهزأه طيب؟ ما إحنا قلنا له بلاش الميه الكتير عمال على بطال الشارع مش ناقص طين. وحرام كل الميه دي... أف يا رمضان الله يسامحك

واقف أصلا بعيد أوي مش عارفه أنادي عليه..طب يرش الزرع ماشي بس ليه الرصيف كمان والأسفلت يا رمضان... دمي بيغلي يا ناس وركبي سابت ..ضغطي بيعلى والا بيوطى والا إيه ؟

- يا رمضااااان ...الحنفية بايظة.

 ( ياريتك كنت هنا يا حبيبي .. كنت تزعق أنت.. ده أنت صوتك عالي ومش بتسكت....قصدي مش بتسكت على الغلط ..صحيح أنا بعمل دور الطيبة اللي بجبر خاطر الناس بعد زعيقك بس برضه.. صدق اللي قال من غير مناسبة .. ضل راجل ولا ضل حيط..)

- يا رمضااان ..الخرطوم بايظ "أرحمني يا ابن الـ .."

- أنا لسه شاريه النهارده يا مدام..

بدأ رمضان يمشي ببطء ويفحص الخرطوم..وواضح أنه أكتشف المشكلة لأنه جاب كيس بلاستيك وبدأ بدأب وهمة يربطه حوالين الوصلة اللي مسببة المشكلة..

الحمد لله الرذاذ خف ورمضان مكمل برضه رش في الرصيف... يالا جايز يجيب طراوة..

الأتوبيس أتأخر ...صوت الخرطوم خرق وداني.. هو ده صوت خرير الماء اللي بيقولوا عليه؟!

ضغطي بيعلى وهنفجر...الأرض طينت..إزاي أقنع رمضان أنه بيضر كوكب الأرض وهو فاكر أن دوره المقدس في الحياه هو مسك الخرطوم ورش الشارع أو الجنينة أو العربيات أو الرصيف أي حاجة وخلاص...أفهمه إيه وهو بيشتغل بضمير..

يارب الأتوبيس يوصل وآخدها ونخرج..نخرج إزاي أنا بهدوم البيت ومش معايا المحفظة والا الموبايل !

هطلع أجيبهم وألبس وننزل...نخرج شوية نتفسح... قديمة نتفسح دي...ننزل شوية

هروح فين؟ أزور حد؟أنا مش قادرة أتفاهم مع حد...لو رحت لناس عندها عيال بيعصبوني أكتر وخصوصا العيال اللي مش متربية..يالا مش هنربي الناس.. دع الخلق للخالق

ماله البيت؟ سترة والله ..نطلع نترزع فوق

بس النهارده الخميس وبكرة أجازة.. الواحد زهقان...نخرج أنا وهي فين؟ في الجونينة؟

نروح النادي نتغدى...بس مش أقل من ساعتين سواقة في الزحمة يكون كتافي خدلت ورجليا نملت...يخرب بيت الزحمة على الشوارع.

حتى لو الواحد استحمل الزحمة هيروح فين؟ الأماكن في مصر مش متنوعة.. حتى الهرم والمتحف والسيرك بقوا موضة قديمة.. والله حاجة تكسف .. الخروجات بقى فيها موضة.. ماهو طبعا كل المرافق والخدمات بتاعت أي حاجة متهالكة وكمان الصيانة.. يعني المحافظة على الأماكن وتحسينها في مصر ياخد صفر من عشرة

حتى مفيش مكان مفتوح ونضيف ببلاش للناس..مفيش حديقة عامة محترمة

لو الواحد عايش بره كان ينزل يتمشى عادي كده هيلاقي مناظر حلوة..في مصر القبح مبدأ ..يالا مش ناقصة فلسفة هي دلوقتي

الخروج في مصر بقى يا إما أكل ...يا إما سينما.....

يالا هنتبطر؟؟ الحمد لله ..وعلى رأي المثل غيرنا مش لاقي...

الناس مموته نفسها عشان رغيف عيش وأنا من جبروتي عايزة أتفسح.. ؟

طب والمصحف ما أنا نازلة

الأتوبيس الزفت ده فين؟ الجيران بيركنوا وطالعين..هيشوفوني وأنا منظري كده؟ والله معرفهومش، أول مرة أشوفهم دول..جايز ضيوف طالعين عند حد..

الواد المفعوص أبنهم نزل جري من العربية وهما لسه بيتلكعوا...الواد جه وقف جنبي..لذيذ أوي بس يا حرام عنده كحة جامدة..كحته وحشة زي بنت نهى صاحبتي..الله يخرب بيت السحابة السوداء..

كح كح كح كح...تستمر محاولاتي في الاسترخاء بلا جدوى مع كل هذه الكحكحة اللعينة من الواد

كح كح كح..إخرس يا مقصوف الرقبة عصبتني بجد..لومسكتك هخنقك..

على رأي الدكتور اللي بييجي مع المذيعة دي اللي مش عارفه أسمها ....صدق لما قال: "الكحة مرض مزعج للأم وليس للطفل ولكنه ذاتي الشفاء"!

لسه سامعه الجملة دي امبارح ومفهمتهاش... وتساءلت..طب ليه الكحة مش مرض مزعج للأب؟؟ جايز لما أخلف أعرف..

كل ده وأهله بيلموا حاجاتهم من العربية؟ هما ناويين على بيات والا إيه؟

الحمد لله أخيراً طلعوا..

الأتوبيس أتأخر.. والله ما انا مستنية... أنا طالعه بيتي..

بصيت من البلكونة الأتوبيس لسه ما ظهرش.. بس الشارع أتحول لطين بفضل رمضان أفندي ..

حتى لو عايزة أخرج لازم أتطين لغاية ما أوصل للعربية..حسبي الله ونعم الوكيل..دايما أنا كده...منحوسة

الأتوبيس أهوه ..ظهر فجأة ودخل الشارع بسرعة وهاتك يا كلاكسات... طب جاي متأخر وبتضرب كلاكس جامد ليه ياض؟

 هو انا اللي أتأخرت عليكو؟ كأنكوا مستنيني من سنة.. عارفة أنا طريقة خدوهوم بالصوت..

طب والله لأنزل على أقل من مهلي عشان أفرسكم زي ما فرستوني.. لطعتوني تلت ساعة في الشارع..

تلت ساعة حفرت على وشي تجاعيد عميقة .. ما هو من البوز اللي أنا كنت ضارباه ... ببص في مراية الأسانسير... على رأي المثل وشي بقى يقطع الخميرة م البيت..

مشرفة الباص مبتسمة لي جامد..أنفجرت فيها..

-أنتوا مش منظمين خالص..أنا واقفة في الشارع بقالي ساعة إلا ربع .. وبعدين إيه الكلاكسات دي كلها؟ هو مين فينا اللي اتأخر؟

-إحنا واقفين من بدري يا مدام

-!#^^*؟!؟؟!؟

دخلت البيت وانفجرت في العياط..قلبي بيدق جامد

-هو فيه إيه يا طنط؟

-مفيش يا حبيبتي أصل أنا استنيت كتير وزعلانه إني زعقت للميس..هكلمها أتأسف لها..

( أنا آسفة إني عليت صوتي يا ميس أميرة بس انتوا أتأخرتوا عليا.)

قفلت السكة وحاولت أسترخي...أستمتع بقى بصحبة زينة..أمورة أوي بنت أختك ما شاء الله عليها..الأطفال أحباب الله فعلاً .. أبتسامتها بريئة.. أنا كمان أبتسمت لها..

-خلاص يا حبيبتي كلمتها ...أنتي وحشتيني أوي وفرحانة أنك جيتي عندنا.. تقعدي معانا على طول ؟؟

 أوعي تكوني زعلتي مني عشان أنا كنت مكشرة جامد...هه؟

أنتي مابترديش ليه؟ زعلانه يا حبيبتي من اللي حصل؟ سرحانة في إيه يا روح مرات خالو؟

-هو أحنا هنتغدى إيه النهارده ياطنط؟

أحبيبتي أزينه.. همك على بطنك زي خالك...

والله ما كنت متضايقة منها خالص ..أنا أول ما عرفت إنها راجعة عليا علشان رشا أختك وراها معاد ...فرحت...قلت أجرب حياة الأمومة السعيدة..وعملت خطط كتيرة لليوم ده...

-عامله لك مفاجأة يا حبيبتي.. إيه رأيك نحضر الأكل سوا ..أنتي كبيرة وشطورة.. مين هيدخل مع طنط حنان المطبخ؟

-بنفاذ صبر : أنا عايزة ريموت التلفزيون يا طنط.. ممكن تطلبي لنا ماكدونالدز أحسن... والنبي يا طنط...

-ده أنا عاملة لك كوسة ورز وسلطة..

-كوسة ؟ اللي هي شبه الخيار..مابحبهاش... وأي خضار تاني برضه لأ يا طنط..

-طب شوفيها الأول !

-لأ يعني لأ ..والله العظيم ماهاكلها

(يا بت لسانك طويل كده ليه..كنت فاكراكي مؤديبة)

-خلاص يا زينة بس نتكلم بالراحة شويه ..هه؟ الريموت هناك وقناة الأطفال على 65

برضه البت بتبص لي بتعجب كأني كائن فضائي .. ماشي يا زينة..

ماكنتش مخططة أننا نفتح التلفزيون كتير..كان نفسي نقرا حاجة..بس مفيش كتب لسنها عندنا.. هما كام مجلة ميكي اللي بنجيبهم ساعات..بس قلت استحالة أقرالها ميكي..

ميكي دي قيمها دخيلة علينا بصراحة... محظوظ معتمد على حظه وشوية خرافات زي حدوة الحصان..إيه الهبل ده.. وبطوط كسلان وفاشل..والاتنين بيتخانقوا عشان يصاحبوا زيزي.. ودهب بخيل ..والساحرة سونيا وعصابة القناع...كلها شخصيات شمال..مفيش غير ميكي الفزلوك.. بس خنيق جدا..

والله "الجدة بطة" هي اللي فيهم..

لأ مش مناسبة ميكي دي

خليها تشوف التلفزيون وخلاص لغاية لما أشوف موضوع الغدا ده... بس يا رب ماتكونش مشغلة توم أند جيري.. ده أصلا مفروض يكون للكبار مش للعيال..كله عنف جامد..حسبي الله ونعم الوكيل..

أخيرا الأكل وصل ودخلت لها علشان ناكل...

-يالا بسرعة يا طنط أنا جعانة أوي...

-بسرعة أعمل إيه يعني..ما أنا جايه أهوه

-ههههههه...بصي يا طنط بابا عمر بيرقص أزاي...ههههه

-إيه اللي أنتي مشغلاه ده يا زينه ؟

-ده عمر وسلمى الجزء الأول ..انتي ماتعرفيهوش يا طنط؟

-إقفليه بسرعه يا زينه !!

-ليه؟

-مش ...مناسب ...ليكي

-أنا شفته تلات مرات قبل كده..بس الجزء التاني أحلى عشان فيه أطفال، دخلته أنا وماما في السينما...هو أصلا فيلم أطفال يا طنط

-نعم؟؟

-هاتي الأكل يا طنط

-ده انتي اللي طنط يا حبيبتي.. طب طالما شوفتيه قبل كده أنا هجيب كايرو دراما..

( أيوه طالما كده كده بايظة أشوف بأه الحلقة الأخيرة من الحاجة زهرة.. ما هي البنت منفتحة خالص مش المسلسل ده اللي هيفسد أخلاقها يعني )

-دي غادة عبد الرازق يا طنط... دي هتدخل السجن ..

-أنتي شوفتيه قبل كده يا حبيبتي  ؟

-أنا حافظاه من ساعة ما جه في رمضان

-طب بتحرقيهولي ليه يا حبيبتي؟  "يا مقصوفة الرقبة أنتي"

-عادي يا طنط

- #!%*؟/!؟

-لما أكبر هسكن في فيلا زي غادة عبد الرازق

-ده تمثيل يا حبيبتي

-لأ ممكن تحصل

-أيوه لازم تذاكري كويس وتبقي شاطرة وتدخلي الجامعة وتذاكري جامد وتشتغلي وتحوشي... لحد ما تحققي كل احلامك..

-ماما قالت لي إمبارح أني هيكون عندي فيلا من غير ماتقول لي لازم أذاكر جامد..ودعت ربنا أن جوزي يجيب لي فيلا..

-يا سلام ما كل الأمهات بيقولوا كده.. أنا ماما قالت لي كده وأنا صغيرة بس ..بس دي مش حاجة مهمة في الحياة..المهم الإنسان يكون مجتهد وعنده ضمير... وكمان يخللي اللي حواليه سعداء ويساعدهم..

-أنا هيكون عندي فيلا وكمان دادة يا طنط..

-يا سلاااام يا حبيبتي..مين اللي قال لك؟ ما يمكن أنتي تطلعي دادة.. –والله أقول لماما يا طنط...

-يا حبيبتي الدادة دي شغل زي أي حاجة ..يعني حاجة مش عيب..دي شغلانة مهمة ومش سهلة..في أمريكا مثلا...

-بابا هيودينا أمريكا بس قال لي ماقلش لحد..

-في أمريكا الدادة دي شغلانة عادية ..حلوة يعني..

-بصي...إنتي أشتغلي دادة يا طنط...ههههههه

-يا بنت الـ #%&*^

-أنا مش هكون دادة علشان أنا حلوة .. كل الناس بتقول لي كده.. يعني انا حلوة زي غادة عبد الرازق فهيكون عندي فيلا ..

أخيراً فاصل إعلاني ..أرحمني يارب من زينة وأم زينة..

-بصي يا طنط الطقم ده..

-طقم  إيه ؟

-خمس حلل وطاسة يا طنط بمية وخمسين جنيه بس..

- ؟؟؟؟

-ومعاه طقم قهوة هدية من غير فلوس أصلاً

-إحنا عندنا طقم قهوة جوه

-والنبي يا طنط حلو أوي ومعاه فازة حلوة عشان تزيّني بيها المطبخ

-دول بيضحكوا على الناس

-لأ ده طقم حقيقي والله أهوه...ده كمان معاه ترابيزة مكواه يا طنط..

-انتي إيه يا زينه؟؟ ..المدرسة دي ما بيدوكيش فيها  واجبات يا حبيبتي؟

-ماباذكرش الخميس

يقطعك يا زينه ويقطع خميس

-أنتي شوفتي اللي أنتي عايزاه يا طنط ..من حقي أقلب حاجة على مزاجي

-إحنا هنقضي اليوم قدام التلفزيون يا زينة.. ده أنتي نسخة من خالو يا روحي..

- ممكن أقلب حاجات أطفال يعني والا لأ ؟

-أعملي اللي أنتي عايزاه أنا داخله أوضب المطبخ.. الله هو ده أطفال ده؟

-ده هاي سكول ميوزيكال يا طنط..فيلم أطفال أهوه على أم بي سي ثري..

-إيه ده؟ دول بيرقصوا بالمايوهات..أقلبي

-أنا كده كده زهقانه منه شفته كتير..هجيب سبيس تون...

(هنعيّل والا ايه؟ بعد كل اللي فات ده هتجيبي سبيس تون دلوقتي؟؟ متناقضة أوي يا زينة)

-في سبيستونات كل ما أريده...كل أحلامي هي في سبيستونات..

-إيه الأغنية دي يا زونزون ؟ أنتي حافظاها كمان ؟

-ده إعلان يا طنط..بصي أنا هجيب اللعبة دي..

-جوزك هيجيبهالك برضه؟

-ههههه.. جوزي إيه يا طنط.. لأ بابا وعدني بيها في الأجازة إن شاء الله

-إن شاء الله ياحبيبتي

يعني يا ربي العيال بقوا يشوفوا حاجات عجيبة وحتى قناة الأطفال البريئة كلها إعلانات بتغري العيال وتحسرهم...شكل اللعب غالي جداَ... لا حول ولا قوة إلا بالله

-أنا مش هدخل المطبخ دلوقتي.. تيجي أعلمك الخياطة ؟ إيه رأيييييييك ؟

-لأ شكراً ..أنا لسه صغيره

- طب شوفتي البازل الكبير اللي على السفرة..ده بتاعي أنا كل يوم بعمل جزء..عارفه ..ده ألف قطعة..

-لأ أنا يوم الخميس بحب أرتاح يا طنط.. علشان عينيا ماتوجعنيش لما أكبر

بصراحة دخلت أنام ساعتين وسبت زينة.. بس قلت لها تحكي لي على اللي حصل في حلقة عشق وجزاء..

أوعى تقول لي أني بشتكي من بنت أختك..دي ملاك .. حقيقي...أنت بره الموضوع ده خالص والله العظيم دي مش شكوى .. أنا بس بفضفض.. أصل جالي إحباط وحالة نفسية من طريقة تفكير زينة... زي ماتقول كده أتفاجئت..وكمان طريقة تفكير مشرفة الباص.. وطريقة تفكير رمضان البواب... وطريقة تفكير رمضان البواب... حسبي الله ونعم الوكيل فيكم..قصدي فيهم .. فيهم هما مش أنت والله..

يوم ما سبت الولد !

في أول سنة جواز لما كنت بتخرج أنت وصحابك بالليل كنت فاكرة في الأول أن كل اللي بيخرجوا هما اللي مش متجوزين .. يعني اللي مالهمش ستات تلمهم..وإن أنت الوحيد المتمرد .. ولما بدأت أسألك " كنت مع مين النهارده ؟ " ، لقيت الكل بيخرج .. اللي عازب واللي متجوز واللي حتى عنده عيال ! صحيح رجالة ليها العجب، يعني سايبين المدامات والأنجال في البيت وأنتوا عايشين حياتكم ؟؟

ولما كنت أقولك أني مستغربة أن الرجالة خارجين كل يوم والستات في البيوت.. تبدأ في التبرير وفي استخدام مصطلحاتك التي تثير جنوني " هما لازم لما أتنين يتجوزوا يبقوا زي التوأم الملتصق ؟!

  محدش قال " ملتصق " ..بس ممكن يخرجوا يوم لوحدهم ويوم يفسحوا الستات.. يعني بدل ما تخرجوا خروجة رجالة كل يوم تخلوها يوم بعد يوم..

بس الصراحة رغم الحوار ده أنا برضه ماكنتش متضايقة أوي .. أهو لما بتخرج لوحدك بلاقي وقت خاص بيا أخلص فيه شغل أو أتفرج على المسلسلات في هدوء.. بس لما كنت بتتأخر جامد وأكون عايزة أنام هو ده اللي بيخوفني ! بضطر أسيب أنوار الشقة كلها مفتوحة.. ياه كنت صغيرة وساذجة..

لما أنت بدأت تكسل تنزل بالليل بعد سنتين تلاته من الجواز أنا بدأت أتضايق.. وأقول فين أيام زمان.. لأنك بتكون في البيت معايا ومش معايا.. لا بتساعدني في شغل البيت ولا بتلعب مع يوسف ولا بتسيبني أتفرج على البرامج اللي بحبها .. وطبعاً بتتضايق لما آجي أمسك التليفون ... يعني أسمك قاعد معايا لكن النتيجة النهائية أن الموضوع واقف عليا بخسارة.. وساعات صحابك هما اللي بقوا بيجولك كمان ! والله أهلاً بيهم من قلبي .. بس ليه أنا اللي أحضر العشا ؟؟

طب وبعدين ايه آخرة الموضوع ده.. هو ليه أنا بقيت النباتشي بتاع البيت ؟ حاسة أني قلبت على كريمة مختار في العيال كبرت.. مابخرجش أبداً لوحدي .. وحتى عمري ما بدخل أنام غير لما أنتوا تناموا الأول..قال ايه عشان أقفّل البيت..حاجة تفلق

بخاف أسيب يوسف معاك علشان أنا اللي عارفه تفاصيل أكتر عن أكله ولبسه ولعبه..وكمان بخاف يتعبك..وطبعا أكيد بخاف على البيت

أصلاً حتى قبل ما يوسف يتولد كنت بخاف أسيبك لوحدك في البيت.. من ساعة ما رحت أبات عند أختي في بيتها أول ما ولدت.. يومين ورجعت لقيت كل الشمع الصغير "أبو ريحه"  سايح ولازق في ترابيزة الصالون..قال إيه النور قطع ! الشمع الصغير ده ديكور ديكووووور والله مش للاستهلاك أثناء قطع النور..ما أنت عارف أن فيه شمع عادي طويل في المطبخ .. إيه البؤس ده مولع خمس شمعات مع بعض ..لأ ولما رجعت لقيتك زعلان أوي عشان نوع الشمع اللي أنا شارياه مش كويس.. ماهوطبعاً مش هينور كويس ...خلصتهم أنت على الفاضي

وليه أصلا قاعد في الصالون؟ الكلام ده لما يجيلنا ضيوف...شكلك معندكش أي وعي خالص بالجواز..هو أنت مكنتش عايش في مصر قبل كده والا إيه؟

ده اللي بيحصل وأنت لوحدك .. طب لو يوسف معاك هيحصل إيه طيب ؟؟

عمري ما فكرت أخرج وأسيبكم لوحدكم ..المسئولية هتبقى كبيرة عليك....

كل الرجالة فاكرة أن القعدة في البيت بالساهل..لكن الحقيقة أنها فيها بلاوي سودة أنتوا ماتقدروش عليها بس بتكابروا أو عاملين مش واخدين بالكوا

مش فاكره أول مرة أعتمدت عليك فيها.. أيوه أفتكرت..

فاكر دور البرد الجامد اللي جالي الشتا قبل اللي فات؟ أتذكر أن دي أول مرة أسيبكم وأدخل أنام قبلكم ،  الدوا هو اللي نيمني .. واستسلمت للنوم وأنا بقول لنفسي "فيها إيه يعني؟ ماهو يوسف متعشي وكلها ساعة وينام.. وسايبالكم البيت زي الفل يعني..مفيش مجال لأي غلطة أو إهمال ممكن يحصل منك حتى لو أنت حاولت مش ممكن تحصل أي خسائر .."

المهم اتكلفتت ونمت وأنا متعشمة أنام لي ست سبع ساعات على بعض..لكن تقول إيه قلب الأم صحيت بعد ساعتين قلبي واكلني على يوسف قلت أشوفه متغطي والا إيه الموضوع.. ولقيتك واقف بتفتح بق الولد بقسوة وهو مابين النوم والصحيان..

-إيه اللي بيحصل؟

-إيه اللي صاحاكي مش قلتي تعبانه؟

-إيه اللي بيحصل ده ؟ بتخلع له سنته والا إيه؟!

-سنته إيه بس مالكيش دعوة أنتي، كملي نوم

-ماليش دعوة ازاي؟؟ بتعمل إيه ف ابني ؟؟ سيب سنان الولد

-أهيه خلاص طلعت الحمد لله..

-هي إيييييييييه دي؟؟ ممكن تفهمني..

-اللبانة.. أرتحتي؟

-إيه أصلا اللي أداه لبانه قبل النوم حرام عليكم أرحموني أنا أصلا عمري ما بوافق أنه ياكل لبان.. ماحبش الأطفال ياكلوا لبان، وخصوصاً الصبيان... وكمان نايم بيها.. مش عارف أنها ممكن تلزق في شعره؟ مش عارف أنها ممكن تقف في زوره وتخنقه؟ مش عارف أني قريت موضوع على موقع ""ستات بيوت اليوم" على الأنترنت أن فيه طفل نام وفي بقه بونبونايه قام النمل دخل من ودانه لغاية مخه والدكاتره معرفوش يعملوا له حاجة؟ مش عارف أن بيتنا كله نمل بقاله فترة؟ أعمل إيه ياربي ؟

 -خلاص إيه اللي حصل يعني؟؟ نمل إيه اللي هيدخل مخ الواد؟ وستات بيوت إيه اللي بتقريه؟ كل ده عشان لبانه؟

-مين اللي أدهاله؟!

-هيكون مين؟ الولد معرفش ينام وزرجن.. نزلنا نشتري بيبسي ودوريتوس وباكو لبان يعني..بعد ما خلص البيبسي والشيتوس أخد لبانه وراحت عليه نومه على الكنبة فنقلته سريره..

-شيتوس وبيبسي لطفل عنده أربع سنين؟ وكمان قبل النوم؟ وكمان نازلين الساعة 12 في عز البرد؟ وبعدين هو كان شيتوس والا دوريتوس؟؟ فهمني ...كل ده عشان نمت بدري يوم يا ربي .. أستغفر الله العظيم.. يارب صبرني..ويعني إيه زرجن؟ مش أنت كنت دايماً مش بتصدقني لما بقولك يوسف بيطلع عيني كل ليلة قبل النوم؟ دلوقت حسيت أد إيه المهمة صعبة؟ وبعدين هو شيتوس والا دوريتوس؟

-مش كويس أني أفتكرت اللبانة وطلعتها من بقه ؟عايزه إيه تاني دلوقت ؟

-كويس جدا جدا..متشكرة خالص ، والولد اللي صحي متعصب وفاق ده؟ مفروض أني أفضل جنبه لحد ما ينام تاني؟ ما أنت عارف أزاي نومه صعب ...

آخر مرة أعتمد على حد ..آخر مرة..حتى لو بموت مش هعتمد على حد غير نفسي..

ياربي دي ماكنتشي أول مرة أعتمد عليك فيها في حاجة تخص يوسف..أنا اللي طيبة وبنسى بسرعة ومابتعلمش .. كان فيه مرة قبلها بس كانت رايحه عن بالي..

المرة اللي أقنعتني نروح أسماعيلية مع صحابك ونبات يوم واحد.. لما أنا كنت معترضة على السفر بيوسف وهو مكملش سنتين ..ماهو مش منطقي نلم شنط ونسافر مشوار طويل عشان يوم واحد..ويوسف لسه بيبي وبيغير بامبرز...مش عارف يعني تحضير شنطته رخم أد إيه؟؟ ... فاكر ألحيت عليا إزاي ..

-بلاش غلاسة وخلينا نسافر..

-والله هتبقى هدة حيل على الفاضي وهترجع تقول لي كان عندك حق

-بلاش تبقي تقيلة في كل حاجة كده يا شيخة ! .. هو أنا بعذبك؟ ده أنا بقولك تغيير جو..

- ....

-يا بنتي دي اسماعيلية..دي حتى دي مش سفرية..خليكي خفيفة شوية..بقولك اسماعيلية...

 سرحت بخيالي للحظات.."الله دي اسماعيلية؟ ...صحيح ... دي حتى مش سفريه... لازم أبقى خفيفة شوية.. والنبي حلوة الأغنية" ..(لأ كل مرة أنا اللي بتعك في السفر..لأ )

-برضه لأ ..سفريه مش سفريه برضه لأ

-عشان أثبت لك أن المسأله سهلة سيبيني أحضر الشنط .. مش هي دي حجتك؟

والله هحضرها في ربع ساعة .. وأنتي هتشوفي

-بجدوالا هزار؟

-والله بقولك بجد..

-خلاص أنا هجيب هدومي.. خللي بالك شنطة يوسف مش بس هدوم..دوا احتياطي وأكل وكده... و.....وحاجات كتير، ما أنت بتشوف أنا بجيب إيه لما بنسافر..

-خلاص خلاص هي مش كيميا بقولك يوم واحد ماتخافيش والله وخليكي واثقة فيا..

- طيب ..شكرا ..أنا فرحانة ومتحمسة قوي.. متشكرة بجد..الحمد لله ياربي هستمتع يوم من غير ما أتعب في تحضير الشنط..

فاكر ليلتها يا حسب الله؟  فاكر وقت النوم وبعد يوم طويل على البحر وندخل شاليه محمود صاحبك وأتاريه أوضة وصالة... يا فرحتي بيكو .. أربع رجالة منهم أتنين متجوزين ومعاهم أطفال  هيناموا في أوضة يا سيد؟ وأنتوا مكنتوش عارفين؟ ما سألتوش؟؟ وطبعا محمود ولا في دماغه عازمنا على أساس ليلة وتعدي .. كتر خيره على كل حال..دي حتى اسماعيلية ..والله دي مش سفرية... 

الليلة عدت  بعد الستات والأطفال ماناموا في الأوضة والرجالة في الصالة ومحمود في البلكونة في البرد..مع أنه أخد أتقل بطانية..بس هنقول إيه؟ صاحب البيت ...الراجل كتر خيره  ..

عزمنا على اسماعيلية..الناس تبقى خفيفة شوية..والله حلوة السفرية...من حقه البطانية...

طبعاً الكارثة دي غطت على كارثتك اللي انا اكتشفتها لما فتحت الشنطة..جايب بيجاما صيفي ليوسف في شهر ديسمبر؟ خلتني أستلف بيجاما بناتي بتاعت بنت نهى ..وبعدين جايب علبتين بيرسول ليه ؟ ومفيش أزازة ميه معدنية واحدة؟ ومجلات ميكي على أساس يوسف يقراها قبل النوم..دي شنطة طفل رضيع دي ؟

وبعدين فين دوا السخونيه؟ صحيح هو مسخنش الحمد لله بس أفرض كان سخن؟ ده أهم حاجة في شنطة العيل دوا السخونية

تاني مرة ف الاسماعيلية...تجيب دوا السخونية.. والميه المعدنية... ده أساسي ف السفريه...مفروض عندك خلفية...

أنا بهلوس والا إيه؟؟

المهم قلت توبه مفيش مرة تانية والا تالته أن شاء الله

بس أعمل إيه في عقلي؟ الذاكرة بقت دعييييفة أوي  ... والإنسان أسمه إنسان من النسيان..إهئ إهئ... المهم كُتر الاكتئاب ومتابعة قناة الإم بي سي 4  والقنوات المغرضة الفاسقة التانية أثروا على مخي... كنت بشوف حلقة معرفش إسمها.. الراجل المحترم عمل مفاجأة للمدام بتاعته الأمريكانية في عيد ميلادها وحجز لها يوم في اللي أسمه إيه ده اللي مايتسمى الـ

SPA

أستغفر الله العظيم ..عارفة أنك هتقول بدعة

بس والله حلو ..رياضة وتدليك ومساج واسترخاء وهي رجعت منتعشة وسعيدة.. إيه المشكلة يعني أما الواحد يخرج من الساقيه اللي هو فيها ويريح يعني يوم.. مع أن الست اللي في البرنامج ولا في ساقية ولا حاجة والرجالة ف أمريكا هما اللي بيعملوا شغل البيت..أومال أنا بقى اللي مستحملة كل ده وعيد ميلادي كمان كام يوم يعني ...عيب والله اللي بيحصل ده..

طب أناديلك تشوف معايا الإعادة جايز تفهم وتحجز لي.. أو حتى تديني الفلوس وأنا أروح..

وأنا لسه هستناك؟ أنا مش صغيرة...أروح أدور أروح أدور أروح أدور...

المهم قلت والله لازم أروح واللي يحصل يحصل.. طبعا كتر خيرك أنك وافقت ..ما أنت معتبر نفسك رئيسي المباشر ... وخفت ساعتها أوصيك على يوسف ونظام البيت لأني عارفة الرد  " أنتي هتشرحي لي أعمل إيه ما أنا عارف كل حاجة ..."

والله كان يوم ظريف واليوجا اللي لعبتها خرجت شوية من الطاقة السلبية اللي معبياها في قلبي شكاير.. والساونا جابت لي ضيق تنفس بس مش مشكلة ..التجربة كلها حلوة وتستاهل أفضي نفسي مرتين أو حتى مرة في الأسبوع وأكيد هرجع لك هادية وريلاكس..

صحيح أنا دخلت البيت الساعة تسعة بالليل وجريت علشان ألحق أبوس يوسف قبل معاد نومه زي المسلسلات...وأنا كلي أمل أني هنام بدري مرة بسبب كل الريلاكسيشين اللي أنا فيه.. لقيتك بتقولي ماتخافيش ده يوسف لسه صاحي حالا.. ده نام من ساعة ما نزلتي..ماتعبنيش الحمد لله..

 نايم من أربعه العصر لتسعة بالليل؟ مش قيلولة طويلة شوية؟ وأنت ما حاولتش تصحيه أو تأكله خالص؟  نام من أربعة لتسعة بجد؟؟ الواد عمره ما بيغفل الضهر.. أكيد أكتئب منك ويأس من أي تفاعل معاك فجاله إحباط ونام كنوع من الهروب..

    وناوي يطبق لبكره على كده.. وأنا معاه طبعا أومال هروح فين ؟ معقولة هدخل أنام مثلا لا سمح الله؟  أكيد لأ ....الحمد لله أني اتعلمت تكنيكات السيطرة على الغضب النهارده.. تصبح على خير أنت دلوقت..