كاذبوووووون !

أنا عارفة أنك زهقت من كتر الشكوى والزن والجوابات.. معذور .. أنا عن نفسي كرهت الكتابة كلها ، أي والله

.. بس برضه مايمنعش أقول لك حاجة كده أخيرة صغيرة..

مالهاش دعوة بيك ماتخفش..

فاكر لما قلت لي أنك المسئول عن أي تصليحات في البيت من هنا ورايح علشان أنت بتفهم في الأجهزة كويس؟ فاكر لما وعدتني أني مش هفتح لأي سباك أو نجار تاني عشان مش عايز تتعبني؟ فاكر لما وعدتني أنك أنت اللي هتقف مع الراجل اللي هيصلح التكييف وكدبت عليا وسبتني ونزلت بحجة مشوار مهم..

مش قصدي ألومك عشان كدبت عليا .. لأ والله خالص ده انا جايالاك في الكلام..

أصل وأنا واقفة  مع فني التكييف .. وهو بينضف الفلتر.. جاله مكالمة نص ساعة على الموبايل.... غصباً عني سرح خيالي .. (عارفة أنك قلت لي ركزي هو بيعمل إيه في التكييف بس  هعمل إيه ما انا زهقانه.. بقولك مكالمة نص ساعة) .. المهم سرح خيالي  في تاريخ البشرية التعس وتاريخ المرأة الأتعس بالضرورة .. لقيت إن كلمة السر في حل مشاكل الستات هي الثورة ..

 لأ مش قصدي أني فكرت أننا نعمل ثورة عليكم .. أنا عن نفسي مش قادرة والله..

أنا قصدي حاجة تانية،  بلاش تتوه مني والنبي ..

فاكر لما كنا بندرس في المدرسة تاريخ الحضارات والعصور واللبخ ده.. كنا بندرس مفهوم الثورة ..

 وعلى ما أتذكر.. كل الثورات مفهومها متقارب ..ماعدا واحدة مكنش لها علاقة بالشعوب والغضب والسياسة والهري ده كله..

الثورة دي كان دمها تقيل ورذلة .. اللي هي صفحة واحد وسبعين على إيدك اليمين في كتاب التاريخ بتاع أولى ثانوي .. على رأي الشيخ مبروك عطية..

اللي هي "الثورة الصناعية" دي عارفها؟  ..

 المصطلح ده كان بيستفزني لأني مش فاهمه حاجة أصلا.. هي حصلت في أوربا.. وكل ما كنت أذاكر الدرس ده

  (ذاكرته مرة كده تقريبا ) .. كنت بتخيل مصنع وناس واقفين بيشتغلوا وعرقانين

بس رغم غموض الثورة دي .. أحب أقول لك إن الثورة المجيدة دي هي أهم ثورة في التاريخ .. هي اللي حررت الستات على فكرة..

فيه ناس كانت بتقول أن الحرب العالمية التانيه هي اللي حررت الستات.. قصدهم أن الستات في أوربا أضطرت تشتغل علشان أعداد غفيرة من الرجالة سافرت عشان تحارب، أو ماتت وهي بتحارب مش فاكرة... ولما الستات أشتغلت واحدة منهم قالت: "ما إحنا بنعرف نشتغل أهوه أومال ليه كنا قبل كده بنخلف بس؟ والله لما الرجالة ترجع من الحرب لنوريهم "

المهم أشتغلوا وعرفوا قدراتهم الحقيقية مش اللي الرجالة كانوا بيحاولوا يروجوه عنهم.

بس أنا برضه شايفه أن الثورة الصناعية اللي بدأت في أواخر القرن التمنتاشر هي الحدث الأهم في تحرير النساء.. أهم من الحرب العالمية كمان.

الثورة الصناعية هي اللي خلت الآلة تحل محل الإنسان .. يعني مفترق طرق أصبح بعده البني آدم يخفف من إعتماده على قدرته البدنيه ويستعمل الآلة .. يعني بس يشغل الآلة ..مش محتاجة قوة.. محتاجة مخ يخترع بيه الآلة.. ويخترع آلة تانية وتالته تريحه أكتر وأكتر..

الإنسان مبقاش كائن وخلاص زي الحيوانات.. الحمار والحصان بيجروا عربيه والثور بيلف الساقية.. الإنسان مبقاش زيهم.. تحرر من عبء ضرورة أنه يكون له عضلات يشتغل بيها.. العقل أهم دلوقتي..

الست كمان حست أنها مش أقل من الراجل.. زي ما كانت فاهمة من التراث القديم بتاع البشرية..

ماهو المجتمع كان بدائي والبقاء فيه للأقوى والأصلح للعيشة في العصور الحجرية .. يعني الراجل- لأن عضلاته أقوى وقادر على الصيد - كان مناسب ليكون هو السيد في فترة التاريخ البدائي !

بس طول الفترة اللي كانت الست فيها مش فاهمة قدراتها.. كانت الرجالة محتكرة الأفكار كمان .. يعني روجوا لأفكار مغلوطة لمدة سنين.. لحد ما بقت من الأشياء المسلم بيها.. وحتى مع بداية العصر اللي إحنا فيه وهو عصر تلاشي الرجال وتمكين المرأة.. الأفكار القديمة للأسف فضلت مستمرة.. الأفكار ليها أجنحة وبتطير  زي ما أنت عارف.. وصعب جداً تموت .. حتى بعد موت أصحابها اللي روجولها..ودي خطورتها

ومن ضمن الأكاذيب دي اللي الرجاله أقنعونا بيها على مر الزمان..  حاجات مستفزة وعجيبة..

 مثلا...أن حوا خرّجت آدم من الجنة .. وأن الست هي نص المجتمع وبتخلف النص التاني! إيه الاستفزاز ده..

 وفيه مقولات كده محفوظة كتير زي أن جمال الست في ضعفها . يعني كل ما تكون الست منكسرة هتكون كيوت أكتر بكتير..وأن أقصرطريق لقلب الراجل معدته..مقولة رومانسية تنين بصراحة...

وأن مفيش أحلى من نَفَس ست البيت في الأكل ! ورغم انتشار الطباخين في المطاعم بس مفيش زي الأكل البيتي ..حتى لو محروق يا سيد..المهم الست تضيع سبع ساعات في تقوير الكوسة ولف الكرنب..

أن الستات عندها قوة تحمل وصبر مع العيال..."طب قول والمصحف"

أن مملكة الست بيتها.. أوتقريباً "الست ملكة في بيتها" ؟... لا تعليق.. إلا إذا كان من باب خادم القوم سيدهم على رأي المثل الشعبي.

 أكذوبة  الـ "وومان تاتش" وترجمتها الحرفية بالعربي علشان أبسطها لك ( أصل لسه الراجل بتاع التكييف بيتكلم في الموبايل وأنا فاتحة الإنترنت ..أستنى كده.. أهوه )  الومان تاتش هي.. براغيت الست أو لعبه الست أو لمسه الست.. ده جوجل بيههبل والا ايه؟ ...عارفة أن دمي تقيل بس بحب استفزك..

بص هي حاجة ليها علاقة بالست.. يعني اللي بيقولوا عليه اللمسه الأنثويه..أي حجج لتدبيس الستات في أي شغل وأي حاجة زي لفق الشربات المقطوعة مثلا أو عمل مكرمية للبيت

مقولة أن الراجل طالما اتجوز مش محتاج يثبت لمراته حاجة تانيه.. ماهو اختارها تعيش معاه.. يعني عداه العيب كده.. الست ماتتطلبش حاجة تانيه ..كلام حلو كتير..معاملة ظريفة لأهلها..الخ من الأشياء السخيفة على قلب الراجل..

 وطبعا مش معقول تسأله أنت "بتحبني يا ممدوح؟!"  لأن ده قمة الاستفزاز.. ماهو اتجوزها خلاص..بتزن ليه تاني الفقرية دي؟

أكذوبة " والله كل ده عشانكم".. يعني الراجل بيتأخر في شغله وبعدين يقول " كل ده عشان مين؟ماهو عشانكم انتوا" .. قال يعني بيشتغل علشان مراته وبيته.. والست لو تفرغت للبيت فهي كده بيعتبروها بتعمل نفس الدور.. يعني الأتنين متساويين في التضحيات في سبيل العيال.. طبعا كدب في كدب.. الست مش بتكتب في الـ "سي في" بتاعها أنها خبرة خمسة وعشرين سنة في الأمومة وشغل البيت.. لكن الراجل في شغله "فعلاً" بيحقق ذاته وطموحه حتى لو كان ده بيصب ماديا في البيت.. فبلاش المقارنات الخايبة دي..

 أكذوبة أن الستات بيحققوا معجزات..على رأي الإعلان ده....هما فعلا بيعملوا كده.. بس ده مش مبرر أنكم تفضلوا تقولوا كده لحد ما ده يبقى العادي .. يعني كل الستات بتصحي العيال وتودي المدارس وتروح الشغل وترجع تذاكر للعيال وتوضب البيت وتوصل العيال التمارين وتوديهم للدكاترة  وتجامل أهل جوزها وتطبخ على بيات.. وأي واحده هتعمل أقل من كده شوية هتبقى خارج منظومة الست الكويسة .. بينما دور جوزها أنه يروح الشغل.. وبس

أكذوبة أنه "مفيش زي الست المصرية" .. الجملة اللي بتيجي في إعلان تاني برضه..

 يعني خلاص سوبروومان.. بس دي مش أكذوبة..لأنه فعلا مفيش حد بيلبس في الحيط كده غيرها ..

ماهي الستات في أوروبا وأمريكا صحيح بتشتغل زي الراجل بس كمان متحررة بجد.. وفي الخليج لابسة نقاب بس متدلعة مادياً ومرتاحة ومتهننة.. يعني فعلا مفيش واحده خدت العيوب كلها في قفه واحده إلا الست المصرية

L

علشان الست المصرية لا هي حصلت تكون ست ولا هي حصلت تكون راجل

مقولة أن الست اللي بتعامل الراجل زي ما الأصدقاء ما بيتعاملوا.. يعني تفضفض له وتشتكي له أو حتى تلومه، دي ست غبية تجهل طبيعة الراجل ( ياأخي طظ في طبيعة الراجل) .. عشان الراجل بطبيعته مش بيحب اللوم والشكوى والكلام الكتير...أهو أي حجج وخلاص عشان تكبير الدماغ..

وطبعاً الست اللي جوزها مكشر أو متعصب أو أي مصيبة سودا..هي اللي غلطانة..ماهي أكيد مش قادرة تفهمه ولا تفهم طبيعة الراجل..

أكذوبة أن عقل الراجل لا يستطيع التركيزإلا في شيئ واحد.. أما الست فممكن تقوم بكذا عمل في نفس الوقت... يعني تغير للعيل وتطبخ وترد على التليفون وتشغل الغسالة ... لكن الراجل يا عيني مخه محدود القدرات.. يعني لو فاتح الفيس بوك والباب خبط مش هيسمع الجرس...هو مش بيستهبل علشان مايفتحش لأ ..هو مش سامع فعلاً.

مسكين بجد..بس يعمل إيه يعني؟! طبيعته كده

بس رغم كده طبيعة الست أنها تكون مخلصة لراجل واحد.. أما الراجل فممكن يكون متعدد الاهتمامات والعلاقات.. الله؟ غريبه شويه.. إشمعنى دلوقتي قادر يركز في كذا حاجة مع بعض؟

طب ليه لو واحد متجوز واستلطف واحدة في الشغل بنختلق له الأعذار ونقول " تلاقي مراته مبهدلة وهي اللي وصلته لكده ".. طب لو واحدة متجوزة استلطفت واحد في الشغل؟؟ حد هيقدر ينطق ويبرر ؟

وفيه كمان المقولة الآلشة بتاعة أن الراجل طفل كبير... الجملة دي بجد بتضحكني ..

يعني نعمل إيه يعني؟؟ يعني محتاج حنان؟؟ طب ومين مش محتاج؟

يعني ندلعه ونهشكه؟ والا نتغاضى عن أي غلطات أوتهبيل؟ أو مانتوقعش منه حاجة .. يعني الراجل مالقاش غير الكذبه السخيفة دي والتشبيه الفاكس علشان يقوله..على أساس أن الست رمز الأمومة والعطاء وهيصعب عليها الطفل اللي جواه؟

أي واحد مصدق الكذبة دي بالذات اللي هي أساس مصايب كتيرة... أحب أقوله أن المرأة المصرية تحملت الكثير..ولم يعد لديها إلا القليل من الصبر..ولم يعد صدرها رحبا يتسع للسخافات كما في الماضي.. وإذا كان إحساس الأمومة يدفعها أحياناً لتقبيل ومداعبة طفل لطيف.. فإنها لا تتوانى عن رمي أي عيل رخم بفردة الشبشب...

فلا تقل أنك طفل كبير يا سيدي إلا بعد أن تعرف نتيجة هذا التشبيه الفكسان.

دي بس نماذج من طريقة التفكير اللي بتصب لصالح الرجالة...وكل المقولات العجيبة دي ...واللي خلتونا نقتنع بيها ملهاش مكان النهاردة .. دي بقت زي الأصنام اللي لازم تتكسر على دماغكم.. لأ مش قصدي يعني..

قصدي لازم نغير الأفكار دي واللي عايز يتمسك بيها لازم يعيش في العصور الحجرية اللي الأفكار دي بتنتمي ليها..بصراحة أنتوا أصلا مخلوقين للعصور دي.. يعني العصر الحديث اللي دور العقل أكتر فيه ده مناسب أكتر للستات.. سيبونا بقى ناخد فرصتنا شوية..

والله أنا كان نفسي أستفيض في الشرح بس بتاع التكييف بينادي لي...البعيد قطع لي حبل أفكاري..

-يا مدام

-نعم يا باشمهندس التكييف تمام؟

-لأ هو تمام..بس برضه فيه مشكله في الكمبوروسور..

-"تمام بس فيه مشكلة".. أنت كده طمنتني.. بس إيه بالظبط يعني المشكلة؟

 -صعبة على حضرتك دي يا مدام ..ممكن تنادي لي الأستاذ.. حاكم مواضيع الأجهزة والتكنالوجيا دي – ماتأخذينيش حضرتك- حاجات يفهم فيها الرجالة أكتر...وأنتي ست العارفين..

-.......

- هوالأستاذ فين يا مداااام؟

- أبقى تعال وأنا أقول لك فين

               ..............................................

هذه الخطابات من وحي الخيال وأي تشابه مع الواقع هو مسئولية كل زوج !

 

بنت أختك

رنة غريبة من نمرة غريبة على موبايلي، هي النمرة غريبة.. مش اللي رشا أديتهالي...لكن الساعة تلاته..معاد رجوع زينة... زي رشا أختك ما قالت لي...

أخدت المفتاح ونزلت ووقفت عند البوابة...الجو حلو..

البواب ماسك الخرطوم وبيرش الجنينة اللي تحت العمارة..الأتوبيس لم يأت..

مضطرة أتابع رمضان البواب وأركز معاه..لسه بيرش...بس الحنفية اللي متوصل فيها الخرطوم بايظة..قصدي يعني الوصلة بايظة..مش عارفة المهم أن الخرطوم بيطلع رزاز على نطاق 360درجة داير مايدور..

أسترخي يا حنان ...ده مجرد رذاذ..المفروض يعني انه يعمل نعنشة..الرذاذ وصل لعندي، ضايقني، مستمر في الدوران والوصول لوجهي المكفهر بسبب الشمس اللي ضربت في وشي بعد ما طلعت من ورا السحابة..

أنادي على البواب أهزأه طيب؟ ما إحنا قلنا له بلاش الميه الكتير عمال على بطال الشارع مش ناقص طين. وحرام كل الميه دي... أف يا رمضان الله يسامحك

واقف أصلا بعيد أوي مش عارفه أنادي عليه..طب يرش الزرع ماشي بس ليه الرصيف كمان والأسفلت يا رمضان... دمي بيغلي يا ناس وركبي سابت ..ضغطي بيعلى والا بيوطى والا إيه ؟

- يا رمضااااان ...الحنفية بايظة.

 ( ياريتك كنت هنا يا حبيبي .. كنت تزعق أنت.. ده أنت صوتك عالي ومش بتسكت....قصدي مش بتسكت على الغلط ..صحيح أنا بعمل دور الطيبة اللي بجبر خاطر الناس بعد زعيقك بس برضه.. صدق اللي قال من غير مناسبة .. ضل راجل ولا ضل حيط..)

- يا رمضااان ..الخرطوم بايظ "أرحمني يا ابن الـ .."

- أنا لسه شاريه النهارده يا مدام..

بدأ رمضان يمشي ببطء ويفحص الخرطوم..وواضح أنه أكتشف المشكلة لأنه جاب كيس بلاستيك وبدأ بدأب وهمة يربطه حوالين الوصلة اللي مسببة المشكلة..

الحمد لله الرذاذ خف ورمضان مكمل برضه رش في الرصيف... يالا جايز يجيب طراوة..

الأتوبيس أتأخر ...صوت الخرطوم خرق وداني.. هو ده صوت خرير الماء اللي بيقولوا عليه؟!

ضغطي بيعلى وهنفجر...الأرض طينت..إزاي أقنع رمضان أنه بيضر كوكب الأرض وهو فاكر أن دوره المقدس في الحياه هو مسك الخرطوم ورش الشارع أو الجنينة أو العربيات أو الرصيف أي حاجة وخلاص...أفهمه إيه وهو بيشتغل بضمير..

يارب الأتوبيس يوصل وآخدها ونخرج..نخرج إزاي أنا بهدوم البيت ومش معايا المحفظة والا الموبايل !

هطلع أجيبهم وألبس وننزل...نخرج شوية نتفسح... قديمة نتفسح دي...ننزل شوية

هروح فين؟ أزور حد؟أنا مش قادرة أتفاهم مع حد...لو رحت لناس عندها عيال بيعصبوني أكتر وخصوصا العيال اللي مش متربية..يالا مش هنربي الناس.. دع الخلق للخالق

ماله البيت؟ سترة والله ..نطلع نترزع فوق

بس النهارده الخميس وبكرة أجازة.. الواحد زهقان...نخرج أنا وهي فين؟ في الجونينة؟

نروح النادي نتغدى...بس مش أقل من ساعتين سواقة في الزحمة يكون كتافي خدلت ورجليا نملت...يخرب بيت الزحمة على الشوارع.

حتى لو الواحد استحمل الزحمة هيروح فين؟ الأماكن في مصر مش متنوعة.. حتى الهرم والمتحف والسيرك بقوا موضة قديمة.. والله حاجة تكسف .. الخروجات بقى فيها موضة.. ماهو طبعا كل المرافق والخدمات بتاعت أي حاجة متهالكة وكمان الصيانة.. يعني المحافظة على الأماكن وتحسينها في مصر ياخد صفر من عشرة

حتى مفيش مكان مفتوح ونضيف ببلاش للناس..مفيش حديقة عامة محترمة

لو الواحد عايش بره كان ينزل يتمشى عادي كده هيلاقي مناظر حلوة..في مصر القبح مبدأ ..يالا مش ناقصة فلسفة هي دلوقتي

الخروج في مصر بقى يا إما أكل ...يا إما سينما.....

يالا هنتبطر؟؟ الحمد لله ..وعلى رأي المثل غيرنا مش لاقي...

الناس مموته نفسها عشان رغيف عيش وأنا من جبروتي عايزة أتفسح.. ؟

طب والمصحف ما أنا نازلة

الأتوبيس الزفت ده فين؟ الجيران بيركنوا وطالعين..هيشوفوني وأنا منظري كده؟ والله معرفهومش، أول مرة أشوفهم دول..جايز ضيوف طالعين عند حد..

الواد المفعوص أبنهم نزل جري من العربية وهما لسه بيتلكعوا...الواد جه وقف جنبي..لذيذ أوي بس يا حرام عنده كحة جامدة..كحته وحشة زي بنت نهى صاحبتي..الله يخرب بيت السحابة السوداء..

كح كح كح كح...تستمر محاولاتي في الاسترخاء بلا جدوى مع كل هذه الكحكحة اللعينة من الواد

كح كح كح..إخرس يا مقصوف الرقبة عصبتني بجد..لومسكتك هخنقك..

على رأي الدكتور اللي بييجي مع المذيعة دي اللي مش عارفه أسمها ....صدق لما قال: "الكحة مرض مزعج للأم وليس للطفل ولكنه ذاتي الشفاء"!

لسه سامعه الجملة دي امبارح ومفهمتهاش... وتساءلت..طب ليه الكحة مش مرض مزعج للأب؟؟ جايز لما أخلف أعرف..

كل ده وأهله بيلموا حاجاتهم من العربية؟ هما ناويين على بيات والا إيه؟

الحمد لله أخيراً طلعوا..

الأتوبيس أتأخر.. والله ما انا مستنية... أنا طالعه بيتي..

بصيت من البلكونة الأتوبيس لسه ما ظهرش.. بس الشارع أتحول لطين بفضل رمضان أفندي ..

حتى لو عايزة أخرج لازم أتطين لغاية ما أوصل للعربية..حسبي الله ونعم الوكيل..دايما أنا كده...منحوسة

الأتوبيس أهوه ..ظهر فجأة ودخل الشارع بسرعة وهاتك يا كلاكسات... طب جاي متأخر وبتضرب كلاكس جامد ليه ياض؟

 هو انا اللي أتأخرت عليكو؟ كأنكوا مستنيني من سنة.. عارفة أنا طريقة خدوهوم بالصوت..

طب والله لأنزل على أقل من مهلي عشان أفرسكم زي ما فرستوني.. لطعتوني تلت ساعة في الشارع..

تلت ساعة حفرت على وشي تجاعيد عميقة .. ما هو من البوز اللي أنا كنت ضارباه ... ببص في مراية الأسانسير... على رأي المثل وشي بقى يقطع الخميرة م البيت..

مشرفة الباص مبتسمة لي جامد..أنفجرت فيها..

-أنتوا مش منظمين خالص..أنا واقفة في الشارع بقالي ساعة إلا ربع .. وبعدين إيه الكلاكسات دي كلها؟ هو مين فينا اللي اتأخر؟

-إحنا واقفين من بدري يا مدام

-!#^^*؟!؟؟!؟

دخلت البيت وانفجرت في العياط..قلبي بيدق جامد

-هو فيه إيه يا طنط؟

-مفيش يا حبيبتي أصل أنا استنيت كتير وزعلانه إني زعقت للميس..هكلمها أتأسف لها..

( أنا آسفة إني عليت صوتي يا ميس أميرة بس انتوا أتأخرتوا عليا.)

قفلت السكة وحاولت أسترخي...أستمتع بقى بصحبة زينة..أمورة أوي بنت أختك ما شاء الله عليها..الأطفال أحباب الله فعلاً .. أبتسامتها بريئة.. أنا كمان أبتسمت لها..

-خلاص يا حبيبتي كلمتها ...أنتي وحشتيني أوي وفرحانة أنك جيتي عندنا.. تقعدي معانا على طول ؟؟

 أوعي تكوني زعلتي مني عشان أنا كنت مكشرة جامد...هه؟

أنتي مابترديش ليه؟ زعلانه يا حبيبتي من اللي حصل؟ سرحانة في إيه يا روح مرات خالو؟

-هو أحنا هنتغدى إيه النهارده ياطنط؟

أحبيبتي أزينه.. همك على بطنك زي خالك...

والله ما كنت متضايقة منها خالص ..أنا أول ما عرفت إنها راجعة عليا علشان رشا أختك وراها معاد ...فرحت...قلت أجرب حياة الأمومة السعيدة..وعملت خطط كتيرة لليوم ده...

-عامله لك مفاجأة يا حبيبتي.. إيه رأيك نحضر الأكل سوا ..أنتي كبيرة وشطورة.. مين هيدخل مع طنط حنان المطبخ؟

-بنفاذ صبر : أنا عايزة ريموت التلفزيون يا طنط.. ممكن تطلبي لنا ماكدونالدز أحسن... والنبي يا طنط...

-ده أنا عاملة لك كوسة ورز وسلطة..

-كوسة ؟ اللي هي شبه الخيار..مابحبهاش... وأي خضار تاني برضه لأ يا طنط..

-طب شوفيها الأول !

-لأ يعني لأ ..والله العظيم ماهاكلها

(يا بت لسانك طويل كده ليه..كنت فاكراكي مؤديبة)

-خلاص يا زينة بس نتكلم بالراحة شويه ..هه؟ الريموت هناك وقناة الأطفال على 65

برضه البت بتبص لي بتعجب كأني كائن فضائي .. ماشي يا زينة..

ماكنتش مخططة أننا نفتح التلفزيون كتير..كان نفسي نقرا حاجة..بس مفيش كتب لسنها عندنا.. هما كام مجلة ميكي اللي بنجيبهم ساعات..بس قلت استحالة أقرالها ميكي..

ميكي دي قيمها دخيلة علينا بصراحة... محظوظ معتمد على حظه وشوية خرافات زي حدوة الحصان..إيه الهبل ده.. وبطوط كسلان وفاشل..والاتنين بيتخانقوا عشان يصاحبوا زيزي.. ودهب بخيل ..والساحرة سونيا وعصابة القناع...كلها شخصيات شمال..مفيش غير ميكي الفزلوك.. بس خنيق جدا..

والله "الجدة بطة" هي اللي فيهم..

لأ مش مناسبة ميكي دي

خليها تشوف التلفزيون وخلاص لغاية لما أشوف موضوع الغدا ده... بس يا رب ماتكونش مشغلة توم أند جيري.. ده أصلا مفروض يكون للكبار مش للعيال..كله عنف جامد..حسبي الله ونعم الوكيل..

أخيرا الأكل وصل ودخلت لها علشان ناكل...

-يالا بسرعة يا طنط أنا جعانة أوي...

-بسرعة أعمل إيه يعني..ما أنا جايه أهوه

-ههههههه...بصي يا طنط بابا عمر بيرقص أزاي...ههههه

-إيه اللي أنتي مشغلاه ده يا زينه ؟

-ده عمر وسلمى الجزء الأول ..انتي ماتعرفيهوش يا طنط؟

-إقفليه بسرعه يا زينه !!

-ليه؟

-مش ...مناسب ...ليكي

-أنا شفته تلات مرات قبل كده..بس الجزء التاني أحلى عشان فيه أطفال، دخلته أنا وماما في السينما...هو أصلا فيلم أطفال يا طنط

-نعم؟؟

-هاتي الأكل يا طنط

-ده انتي اللي طنط يا حبيبتي.. طب طالما شوفتيه قبل كده أنا هجيب كايرو دراما..

( أيوه طالما كده كده بايظة أشوف بأه الحلقة الأخيرة من الحاجة زهرة.. ما هي البنت منفتحة خالص مش المسلسل ده اللي هيفسد أخلاقها يعني )

-دي غادة عبد الرازق يا طنط... دي هتدخل السجن ..

-أنتي شوفتيه قبل كده يا حبيبتي  ؟

-أنا حافظاه من ساعة ما جه في رمضان

-طب بتحرقيهولي ليه يا حبيبتي؟  "يا مقصوفة الرقبة أنتي"

-عادي يا طنط

- #!%*؟/!؟

-لما أكبر هسكن في فيلا زي غادة عبد الرازق

-ده تمثيل يا حبيبتي

-لأ ممكن تحصل

-أيوه لازم تذاكري كويس وتبقي شاطرة وتدخلي الجامعة وتذاكري جامد وتشتغلي وتحوشي... لحد ما تحققي كل احلامك..

-ماما قالت لي إمبارح أني هيكون عندي فيلا من غير ماتقول لي لازم أذاكر جامد..ودعت ربنا أن جوزي يجيب لي فيلا..

-يا سلام ما كل الأمهات بيقولوا كده.. أنا ماما قالت لي كده وأنا صغيرة بس ..بس دي مش حاجة مهمة في الحياة..المهم الإنسان يكون مجتهد وعنده ضمير... وكمان يخللي اللي حواليه سعداء ويساعدهم..

-أنا هيكون عندي فيلا وكمان دادة يا طنط..

-يا سلاااام يا حبيبتي..مين اللي قال لك؟ ما يمكن أنتي تطلعي دادة.. –والله أقول لماما يا طنط...

-يا حبيبتي الدادة دي شغل زي أي حاجة ..يعني حاجة مش عيب..دي شغلانة مهمة ومش سهلة..في أمريكا مثلا...

-بابا هيودينا أمريكا بس قال لي ماقلش لحد..

-في أمريكا الدادة دي شغلانة عادية ..حلوة يعني..

-بصي...إنتي أشتغلي دادة يا طنط...ههههههه

-يا بنت الـ #%&*^

-أنا مش هكون دادة علشان أنا حلوة .. كل الناس بتقول لي كده.. يعني انا حلوة زي غادة عبد الرازق فهيكون عندي فيلا ..

أخيراً فاصل إعلاني ..أرحمني يارب من زينة وأم زينة..

-بصي يا طنط الطقم ده..

-طقم  إيه ؟

-خمس حلل وطاسة يا طنط بمية وخمسين جنيه بس..

- ؟؟؟؟

-ومعاه طقم قهوة هدية من غير فلوس أصلاً

-إحنا عندنا طقم قهوة جوه

-والنبي يا طنط حلو أوي ومعاه فازة حلوة عشان تزيّني بيها المطبخ

-دول بيضحكوا على الناس

-لأ ده طقم حقيقي والله أهوه...ده كمان معاه ترابيزة مكواه يا طنط..

-انتي إيه يا زينه؟؟ ..المدرسة دي ما بيدوكيش فيها  واجبات يا حبيبتي؟

-ماباذكرش الخميس

يقطعك يا زينه ويقطع خميس

-أنتي شوفتي اللي أنتي عايزاه يا طنط ..من حقي أقلب حاجة على مزاجي

-إحنا هنقضي اليوم قدام التلفزيون يا زينة.. ده أنتي نسخة من خالو يا روحي..

- ممكن أقلب حاجات أطفال يعني والا لأ ؟

-أعملي اللي أنتي عايزاه أنا داخله أوضب المطبخ.. الله هو ده أطفال ده؟

-ده هاي سكول ميوزيكال يا طنط..فيلم أطفال أهوه على أم بي سي ثري..

-إيه ده؟ دول بيرقصوا بالمايوهات..أقلبي

-أنا كده كده زهقانه منه شفته كتير..هجيب سبيس تون...

(هنعيّل والا ايه؟ بعد كل اللي فات ده هتجيبي سبيس تون دلوقتي؟؟ متناقضة أوي يا زينة)

-في سبيستونات كل ما أريده...كل أحلامي هي في سبيستونات..

-إيه الأغنية دي يا زونزون ؟ أنتي حافظاها كمان ؟

-ده إعلان يا طنط..بصي أنا هجيب اللعبة دي..

-جوزك هيجيبهالك برضه؟

-ههههه.. جوزي إيه يا طنط.. لأ بابا وعدني بيها في الأجازة إن شاء الله

-إن شاء الله ياحبيبتي

يعني يا ربي العيال بقوا يشوفوا حاجات عجيبة وحتى قناة الأطفال البريئة كلها إعلانات بتغري العيال وتحسرهم...شكل اللعب غالي جداَ... لا حول ولا قوة إلا بالله

-أنا مش هدخل المطبخ دلوقتي.. تيجي أعلمك الخياطة ؟ إيه رأيييييييك ؟

-لأ شكراً ..أنا لسه صغيره

- طب شوفتي البازل الكبير اللي على السفرة..ده بتاعي أنا كل يوم بعمل جزء..عارفه ..ده ألف قطعة..

-لأ أنا يوم الخميس بحب أرتاح يا طنط.. علشان عينيا ماتوجعنيش لما أكبر

بصراحة دخلت أنام ساعتين وسبت زينة.. بس قلت لها تحكي لي على اللي حصل في حلقة عشق وجزاء..

أوعى تقول لي أني بشتكي من بنت أختك..دي ملاك .. حقيقي...أنت بره الموضوع ده خالص والله العظيم دي مش شكوى .. أنا بس بفضفض.. أصل جالي إحباط وحالة نفسية من طريقة تفكير زينة... زي ماتقول كده أتفاجئت..وكمان طريقة تفكير مشرفة الباص.. وطريقة تفكير رمضان البواب... وطريقة تفكير رمضان البواب... حسبي الله ونعم الوكيل فيكم..قصدي فيهم .. فيهم هما مش أنت والله..